Si Noynoy ang Galit sa Kaliwa

(1)

Noong nakaraang buwan, sinabi ni Manuel L. Quezon III, kolumnistang propagandista ni Noynoy Aquino, na galit ang Kaliwa sa manok niya, kaya ginamit umano nito si Chiz Escudero para banatan si Noynoy. Ngayon, matapos ang maraming pangyayari, malinaw na ang katotohanan: si Noynoy ang galit sa Kaliwa, hindi ang kabaligtaran.

Malinaw ang ipinapakita ng datos. Ang Kaliwa ang nagpursige para makausap si Noynoy para sa posibleng pagtutulungan sa plataporma at kampanyang elektoral. Pero hindi agad tumugon si Noynoy sa alok ng Kaliwa na makipag-usap. At noong nakipag-usap na siya sa Kaliwa, sa wakas, himutok pa ang sinabi niya – partikular sa pagpiket ng mga magsasaka ng Hacienda Luisita sa bahay ng pamilya Aquino noong 2005.

Ang hinala ko, ang mafia” sa Liberal Party na ikinabwisit ni Serge Osmeña at naging dahilan ng pag-alis niya rito ay binubuo ng mga sosyal-demokrata at opisyal ng Akbayan. Mas galit sa Kaliwa ang mga grupong ito kung ikukumpara sa ibang tradisyunal na pulitiko. Bukod sa personal na “sama ng loob” ni Noynoy sa Kaliwa, malamang na malakas din ang tulak – o hawak ba? – ng mga ito kay Noynoy.

Makikita ang paghawak nila kay Noynoy sa dalawang bagay. Una, itinulak nilang magsalita si Noynoy nang pabor sa reproductive health bill, paborito nilang isyu. Maayos ang laman ng batas. Pero mapanganib na isyu ito para sa isang pulitiko dahil, tulad ng nangyari, iniimbita nito ang galit ng Simbahang Katoliko. Na ayos pa rin sana. Kaya lang, halatang hindi kayang tindigan ni Noynoy ang posisyon, kaya umatras siya.

Ikalawa, pragmatiko ang mga pwersang ito pagdating sa pulitika. Handa silang makipagtulungan sa mga tradisyunal na pulitiko para sa interes nila. Pero pagdating sa Kaliwa, ideolohikal ang galit nila. Kaya naman binuo ang tiket pangsenado ng Liberal Party ng mga kandidatong hindi gaanong kilala – gayung bukod sa may makabayang rekord sina Satur Ocampo at Liza Maza ay mas popular din sila sa mga mamamayan.

Sa dalawang bagay na ito, makikita ang makasariling interes ng mga sosyal-demokrata at opisyal ng Akbayan na nananaig sa kandidatura ni Noynoy. Sa una, pinagsalita nila ito sa isang isyung naghiwalay rito sa inaasahan nitong isang base ng suporta. Sa ikalawa, pinahina nila ang tiket pangsenado nito sa pagpili sa mga kandidatong maaaring may malinis na rekord, pero hindi gaanong kilala, para kontrahin ang Kaliwa.

(2)

May mahalagang punto, lagi naman, si Angela Stuart-Santiago, iskolar at tagahanga ng mga akda ni Ninoy Aquino. Aniya, taliwas sa rekord ni Ninoy ang pag-ilag, kung hindi man galit, ni Noynoy sa Kaliwa. “Kung buhay si Ninoy, hindi siya magdadalawang-isip na makuha sina Satur at Liza para tumakbo sa Senado bilang mga [Liberal Party].”

Inungkat pa ni Stuart-Santiago ang sulatin ni Ninoy na nagpapakita ng pagkilala, kung hindi man pagrespeto, nito sa mga nagagawa ng Communist Party of the Philippines at New People’s Army sa kanayunan at sa bansa, at ang mga tala sa kasaysayan na sumuporta umano si Ninoy sa mga grupong ito. Ibig sabihin, bagamat may pagtunggali si Ninoy sa Kaliwa, bukas ang isip niya rito, kahit sa radikal na Kaliwa pa nga sa bansa.

Sa puntong ito, mahalagang ipasok ang sentral na argumento ni Conrado de Quiros para itulak na tumakbo si Noynoy at suportahan ang kandidatura niya. Hindi umano nito lalapastanganin ang alaala at pamana ng mga magulang niya. Pero paano kung malinaw na taliwas o katunggali ng tindig ni Noynoy ang tindig ni Ninoy? Sa tingin ko, panimula pa lang ang usapin ng Kaliwa sa mga isyung makikita ang pagkakaibang ito.

Lagi pa namang sinusundan ang mga pangalan nina Ninoy at Cory ng salitang “demokrasya.” At ang Kaliwa, batay sa kasaysayan ng bansa, ay may mahalagang papel sa pagtatanggol at pagpapalawak pa nga sa demokrasyang umiiral sa Pilipinas. Maaaring hindi kayo sang-ayon sa sinasabi kong papel ng Kaliwa, pero ang punto: mahalagang usapin ang pagkakaiba ng pagtingin sa Kaliwa nina Ninoy at Noynoy.

Mayroon ding buhay na patunay ng isang inapo na nagtaksil at sumalaula sa alaala at pamana ng mga ninuno niya. Clue: tumatakbo siyang senador sa tiket ni Noynoy at dahilan ng pag-alis doon ni Osmeña. Sagot: Ralph Recto. Hindi ba’t napakalaki ng ambag ni dating Sen. Claro Mayo Recto sa pagsusulong ng nasyunalismo sa bansa? Pero ang inapo niya, mas dikit sa kalaban niyang kolonyal na si Carlos P. Romulo.

Nakakapagtaka ang “sama ng loob” ni Noynoy sa pagpiket ng mga magsasaka sa bahay ng pamilya Aquino. Hindi ito dapat ikasama ng loob at personalin – “personalize” daw, sabi ni Satur Ocampo – ng matagal nang pulitikong tulad niya. Natural ito sa pulitika. Pero kung mapagkaisa kang lider, lalo na’t nananawagan ka ng “pagbabago,” hahanap ka ng mapagkakaisahan sa Kaliwa, na isang mahalagang pwersa sa bansa.

(3)

Sa kongkreto, ang mga nanggagalaiti kontra sa Kaliwa dahil sinuportahan nito si Manny Villar, ay iyung mga tagasuporta ni Noynoy. Nahawa na sila sa laging pantasya ng mga sosyal-demokrata at opisyal ng Akbayan na nalalamangan nila ang Kaliwa – na kung hindi ito bumubuntot sa kanila ay nagpapakatrapo ito sa iba’t ibang larangan.

Paano naman susuportahan ng Kaliwa si Noynoy, eh ni hindi niya itinuring na tao ang Kaliwa? Iniwasan niyang kausapin at noong nakausap na’y puro bakod pa ang itinayo. Ang gusto yata ng mga tagasuporta ni Noynoy ay basta na lang sumuporta ang Kaliwa sa kandidato nila. Pwede ba naman iyun? Ni hindi tampok sa paglaban sa rehimeng Arroyo ang manok nila para basta na lang suportahan. Ang nanay niya, oo; siya, hindi.

Samantalang si Villar, todo-kayod para makipag-usap at makipagtulungan sa Kaliwa. Tradisyunal na pulitiko siya. Si Noynoy ba, hindi? May kaso si Villar ng korupsyon. Dapat imbestigahan siya at harapin niya. Pero hindi rin malinis ang rekord ni Noynoy sa mga mamamayan. Si Villar daw ang tunay na manok ni Gloria. Dapat mapatunayan iyan, dahil ang pinakamaingay sa pagsasabi niyan ay mga tagasuporta ni Noynoy.

Ang kakatwa pa, itong mga kontra-Kaliwang ito, gusto pang palabasing isinusuko ng Kaliwa ang rebolusyon sa pag-endorso kay Villar. Galit na galit sila sa rebolusyon, pero ngayon, ginagamit nila ito na para bang iginagalang man lang nila ang rebolusyon. Gusto nilang palabasing inirerespeto nila ang Kaliwa, pero gusto nilang lampasuhin ang Kaliwa dahil lang sa tindig nito sa eleksyon – na sekundaryo lang para sa Kaliwa.

Ang problema kasi, gusto nilang palabasing “nasa gitna” sila. Uupak sa rehimeng Arroyo kapag may ginawang mali. Uupak din sa Kaliwa kapag sa tingin nila’y may ginawang mali. May “simpatya” raw dito. Pero minsan, nadudulas magsabing walang pinagkaiba ang rehimen at Kaliwa. Nakakatawa ang pantasya ng mga “manunulat” na ito sa kanilang sarili. Ang iniisip nila, nasa gitna sila. Ang totoo naman, nasa Kanan.

Sa tingin ko kasi, kung talagang galit ka sa rehimeng Arroyo at gusto mong itaguyod ngayong eleksyon ang mga tunay na lumaban sa rehimeng ito, dapat ang katapatan mo ay sa Kaliwa. Dahil ito talaga ang matatag na lumaban sa rehimeng Arroyo kahit pa pinagpapatay, dinukot at dinahas ang mga lider at miyembro nito. Sa Kaliwa dapat ang katapatan, hindi kay Villar at lalong hindi kay Noynoy. Nasaan ba siya noon?

21 Disyembre 2009

Post a comment or leave a trackback: Trackback URL.

Comments

  • Karen  On December 20, 2009 at 10:20 pm

    Sa totoo lang, hindi ko masyado nariringgan kun ano ang pinaggagawa ni Noynoy sa Senado. Maliban lang noong magsalita sya pagkatapos ng masaker sa HLI noong 2004. Ang katanungan lang naman e, napagkikitaan ba ng matatag paninindigan at sense of social justice si Noynoy Aquino? I *shrug*. At ung mga bumakod kay Mar na mga SDs [noong i attempt na kausapin din sya ilang buwan na ang nakaraan] ay ung bumabakod din ngayon kay Ninoy. Aba, nakakita siguro ng dyipning pwede sakyan ang mga SDs at Akbayan papuntang Malakanyang at maging ‘political force to contend with’. Ehh?

  • Karen  On December 20, 2009 at 10:23 pm

    *Noynoy. Hindi si Ninoy ang binabakuran ng mga SDs. Hahaha.

  • unidentifiedwalkingobject  On December 21, 2009 at 1:41 pm

    May attempt ba na makipag-usap ang kaliwa kay Jajajajamby sa isyu ng pagtakbo nito sa eleksyon? Naisip ko lang since isa siya sa mga presidentiables na mas may nagawang matino..

  • nunal  On December 21, 2009 at 1:54 pm

    kagaya ni cory e biktima rin ng kanyang uri si noynoy. kaya lalong di siya dapat pagkatiwalaan.

  • kapirasongkritika  On December 22, 2009 at 1:28 am

    @ Karen: Salamat sa komento mo! Nakakatuwang makabasa ng maagang komento sa bagong entri! Hehe. Totoo. Si Noynoy ang tagapagsalita ng pamilya Aquino noon. Mukhang kaisa siya sa linya ng rehimeng Arroyo na NPA ang gumawa ng masaker — sana may mag-research. Malamang nga, ano? Mahilig makisakay ang mga iyan.

    @ unidentifiedwalkingobject: Oo. Totoo namang may mga tindig si Jamby na mahusay. Kaya lang, mahalaga rin sa halalan ang kapasidad manalo. Ang alam ko, sa batayang ito, tinanggihan siya ng mga pambansang demokrata. Pinatunayan na kasi ng karanasan ng Partido ng Bayan noong 1987 na hindi sapat ang progresibong plataporma para manalo.

    @ nunal: Totoo iyan. Ang pahabol nga sa itaas, kahit si Ninoy na biktima rin ng uri niya, kinayang magbukas ng isip sa Kaliwa. Pero syempre, panahon iyun ng matinding paglaban sa diktadura — na talaga namang nakakapagpabago ng kaisipan ng mga tao.

  • Karen  On December 22, 2009 at 12:49 pm

    Madali lang nang naman malaman kung sino ang mga bumaril ng mga manggagawang bukid sa HL: tingnan lang yung mga video footages na nakuha ng KMP at iba pang organisasyong nandun sa araw na yun. Maliban pa sa datus ng presensya ng AFP sa lahat ng sulok na yata ng mga baryong sasakupin ng HL operation. Yung iba namang pinaslang ng lider ng AMGL, may batayan ang mga suspetsong mga militar/paramilitar din ang may kagagawan. Hay. Agitated naman ako. Kakain ko pa naman ng masarap na kadyos, baboy at langkang ulam.

  • unidentifiedwalkingobject  On December 22, 2009 at 2:23 pm

    Sabagay, good point nga naman yung lesson ng 1987🙂 though kay Jajajamby pa rin ang boto ko sa presidential race hehe. salamat na rin sa pagsagot

  • jessie  On December 23, 2009 at 3:36 am

    lupet nman nito!!
    kapal tlaga ng mga mukha nyang mga
    dilawan!!
    wala ng ginawang mabuti eh!
    sulong lng mga kasama!!ndi tau nalilihis ng linya!!
    “LIZA AT OCAMPO, sa SENADO!!

  • kapirasongkritika  On December 27, 2009 at 6:14 pm

    @ Karen: Salamat sa komento! Totoo, hindi nila maitanggi ang ebidensya. Salamat sa alternatibong midya! Komento ka lang dito, agitated ka man o hindi. Hehe.

    @ unidentifiedwalkingobject: Salamat sa pagsagot — at pagiging magalang. Iginagalang ko ang choice mo. Maayos naman talaga si Senadora.

    @ Jessie: Nakakatuwa ang katiyakan mo. Hehe. Tingin ko nga, mas mahalaga para sa atin ang maipanalo sina Liza at Satur sa Senado! Hehe.

  • gingmaganda  On January 1, 2010 at 10:39 pm

    ikinatutuwa ko ang taktikal na alyansa ng kaliwa at ni manny villar. wala akong tiwala kay noynoy, e.

    patuloy ko pa rin susundan ang makulay na array ng mga campaign ads ni villar, pati na rin ang kanyang bonggang strat plan. =)

    sa sipag at tiyaga, lahat ay madale!

  • diwa81  On January 2, 2010 at 10:47 pm

    ang alam ko, hindi naman tinanggihan si Jamby. sinikap na hikayatin siyang huwag nang tumakbo kasi nga kulang ang makinarya niya. isa pa, hindi naman pwedeng dalawa ang suportahang presidente. pero syempre, magkaalyado ang relasyon kaya hindi pwedeng magdikta ang isa at pursigido rin talaga si Jamby.

    kaugnay ng mga socdem, iniisip ko lang na baka masyado namang napapalaki ang papel nila sa partido nila noynoy. totoo na galit sila sa ND, pero bumubuntot lang sila sa LP at hindi kumukontrol kina noynoy. kaya si noynoy mismo, galit sa kaliwa kahit walang bumabakod sa kanila.

  • kapirasongkritika  On January 4, 2010 at 8:34 am

    @ gingmaganda: Haha. Bukod-tangi talaga ang mga pagtingin mo sa mga bagay. Hehe. Hindi ka rin kasi patangay sa tingin ng marami. Mabuti naman!

    Ang bongga nga ng prop niya. Pero syempre, pagbabago sa istrukturang panlipunan ang kailangan natin, bukod pa sa sipag at tiyaga. O baka sipag at tiyaga sa pakikibaka. Hehe.

    @ diwa81: Ah, okey. Hindi pala tinanggihan. Mas hinikayat lang na sa ibang pwesto tumakbo. Iginagalang naman talaga ng Kaliwa si Jamby.

    Iyun nga ang titulo ng entri: Si Noynoy ang Galit sa Kaliwa. Pero talagang hindi rin matatawaran ang presensya at lakas ng soc-dem sa kanyang kandidatura. Mismong campaign manager niya — si Butch Abad — at mga personalidad ng makinarya niya, talagang soc-dem.

    • diwa81  On January 8, 2010 at 12:25 am

      oo nga. kaya lang kasi sa daloy ng talakayan, parang sila ang kumokontrol kay noynoy at hindi dahil bumubuntot lang sila sa kanya.

      • kapirasongkritika  On January 10, 2010 at 6:01 pm

        Actually, kung “bumubuntot” para sa sariling pakinabang, korek ka. Pero hindi siguro kung ang “bumubuntot” ay pagpapatakbo ng kandidatura. Parang influential talaga ang soc-dem, hindi lang bumubuntot eh.

  • fatch  On January 6, 2010 at 11:28 am

    wla akong tiwala s kanilang lahat. Pinagdadasal ko lang na sana ang manalo ei ung may kht katiting man lang na pagmamahal s masa at may tiwala s kakayahan ng bawat pilipino na umasenso. Di puro bulsa nla pinapataba.

    Masarap pading isiping maraming kbataan ang nani2walang dadating ang panahong magkakaroon tau ng matin0ng mga lider.

  • krguda  On January 17, 2010 at 1:09 pm

    Kontribusyon ng Sinewaya sa talakayan hinggil sa penomenon ni Noynoy: artikulo hinggil sa isang nakakairitang merchandising campaign ngayon.

    http://sinewaya.wordpress.com/2009/12/15/ninoy-the-straw-man/#more-238

  • kapirasongkritika  On January 18, 2010 at 4:11 am

    Salamat! Sabi iyan ni Conrado De Quiros: hindi kailangang direktang magkampanya si Noynoy sa propaganda. Kailangan lang, People Power, pride ng mga Pinoy, etc. May prangkisa yata si Noynoy dito? Hehe. Hindi ang sambayanang Pilipino?

  • bruce  On January 21, 2010 at 2:49 pm

    Ahahaha! O ngayon, may tiwala pa kayo kay Money Villar? Mga ugok!!!!

  • krguda  On January 21, 2010 at 4:56 pm

    Ampanget magsulat niyang Manuel Buencamino! As in, krudo kung krudo, parang tamad mag-isip si kuya. At least, si Conrad, may cadence at elegante, kahit predictable. Itong Buencamino, parang pulitikal na bersiyon ni Xerex Xaviera.

  • kapirasongkritika  On January 23, 2010 at 6:37 am

    @ Bruce: “Buencamino” ba ang apelyido mo? Hehe. Bakit ambabastos ninyo? As if malinaw na malinaw ang ebidensya.

    @ KRGuda: Totoo! Hindi mo alam kung ganyan talaga siya magsulat kaya he’s making a virtue out of a necessity — nagpapakabarumbado. Hehe.

    Marangal naman si Conrado, in fairness at compared to lugaw. Prinsipyo ang binabanatan noon, nasa antas ng teorya. Itong si Buencamino, nasa antas ng tsismis at intriga. Iyan na ba talaga ang kaya ng utak ng mga inapo ng mga aristokrata ng bansa?

Trackbacks

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: